cotton market-जुलै पर्यंत वाट पाहिली पण कापूस उत्पादकांच्या पदरी निराशाच

लोकगर्जनान्यूज

बीड : कापसाचे मार्केट ( cotton market ) वाढेल व आपण कापूस विक्रीसाठी नेऊ म्हणत शेतकऱ्यांनी जुलै महिन्यापर्यंत वाट पाहिली. पण मार्केट ( भाव ) वाढत नसल्याने नाविलाजाने हंगामाच्या शेवटी कवडीमोल दराने कापूस विकण्याची वेळ शेतकऱ्यांवर आल्याने पदरी निराशाच पडली असल्याची प्रतिक्रिया व्यक्त केली जात आहे. शेवटीच कापूस विक्रीसाठी आणल्यामुळे मे अथवा जून महिन्यात बंद होणारें जिनिंग,प्रेसिंग सुरु असल्याचे चित्र आहे.

यावर्षी कापसाला सुरवातीला 9 हजार प्रतिक्विंटल भाव होता. परंतु गतवर्षी शेवटी 13 हजार रुपये प्रतिक्विंटल भाव मिळाला होता. यामुळे यावर्षीही तोच भाव मिळेल या आशेने शेतकऱ्यांनी कापूस दाबून ठेवला होता. पण अद्याप पर्यंत कापूस मार्केट ( cotton market ) वाढलाच नाही. सध्या चांगल्या प्रतीचा कापूस 7 हजार तर फरतड 5 हजार 500 प्रतिक्विंटल असा भाव आहे. दर वाढतील म्हणून शेतकऱ्यांनी कापूस घरातच दाबून ठेवला होता. पण जून महिना संपून जुलै महिना सुरू झाला तरीही भाव वाढत नाहीत. आता जिनिंगही बंद होत आहेत. आता कापूस विकला नाही तर पुढील वर्षीच विकावा लागेल म्हणून शेतकऱ्यांनी कापूस विक्रीसाठी काढला आहे. जवळपास पाच महिने कापूस सांभाळूनही अपेक्षित भाव न मिळाल्याने शेतकऱ्यांच्या पदरी निराशाच पडली असल्याची प्रतिक्रिया व्यक्त केली जात आहे.
जुलै महिन्यातही जिनिंग सुरुच
राज्यात जवळपास 800 जिनिंग असून त्यातील मराठवाड्यात 275 जिनिंग आहेत. बीड जिलवह्याचा विचार केला तर येथे 42 जिनिंग असून त्यातील केवळ या हंगामात 20 ते 25 जिनिंग सुरू होत्या. सुरवातीला कापसाची आवक कमी असल्याने त्याही पुर्ण क्षमतेने चालल्या नाहीत. जिनिंग या मे अथवा जूनच्या दुसऱ्या आठवड्यात जवळपास बंद होतात. पण यावर्षी शेतकऱ्यांनी शेवट पर्यंत भाववाढीची आस न सोडल्याने घरातील दाबून ठेवलेला कापूस जून महिन्यात विक्रीसाठी काढला. सध्याही बाजारात आवक सुरुच आहे. यामुळे जुलै महिन्याचा दुसरा आठवडा संपण्याच्या उंबरठ्यावर असतानाही काही जिनिंगचे चाक फिरायला सुरू आहेत. परंतु 15 जुलै पर्यंत सर्व जिनिंग बंद होऊ शकतात.
सुताला उठाव नसल्याने कापूस बाजारात ( cotton market ) मंदी!
यावर्षी सुरवातीला कापसाला चांगला भाव रहिला. पण नंतर कमी होत गेला त्यात उठावच दिसून आला नाही. याचे कारण म्हणजे सुत मिलमध्ये मागणी अभावी दोरा पडून आहे. जिनिंग मध्ये सरकी काढलेला कापूस पडून आहे. तसेच तेलाचे कमी झालेले भाव यामुळे सरकीलाही तेजी नाही. या सर्वांचा परिणाम कापूस दरावर झाला असल्याचे जाणकार सांगतात.