BEED- वीजेचा खांब तुटून औतावर पडल्याने बैलजोडी दगावली तर शेतकरी जखमी: केज तालुक्यातील घटना
लोकगर्जनान्यूज
केज : शेतात पाळी घालताना अचानक वीजेचा खांब तुटून विद्युत तारा औतावर पडल्याने औताला जुंपलेली बैलजोडी दगावली तर शेतकरी जखमी झाल्याची घटना तुकूचीवाडी ( ता. केज ) येथे मंगळवारी ( दि. 21 ) दुपारी २ च्या सुमारास घडली आहे. शेतकऱ्याचे प्राण वाचले असल्याचे समाधान असले तरी शेतकऱ्याची बैलजोडी दगावल्याने मोठं आर्थिक नुकसान झाल्याने हळहळ व्यक्त केली जात आहे.
रामराव विठ्ठल मोराळे रा. तुकूचीवाडी ( ता. केज ) असे जखमी शेतकऱ्याचे नाव आहे. ते मंगळवारी ( दि. 21 ) दुपारी स्वतःच्या पांढरी शिवारातील सर्वे नंबर 291 मध्ये बैल औताने शेतात पाळी घालत होते. त्यांच्या शेतातून विद्युत लाईन ( वाहिनी ) गेलेली आहे. या लाईनचा अचानक एक खांब तुटला व पाळी घालत असलेल्या शेतकऱ्याच्या औतावर तारांसह पडला. तारेत विद्युत प्रवाह सुरू असल्याने वीजेचा धक्का लागून खिलार बैलांची जोडी दगावली तर शेतकरी रामराव मोराळे जखमी झाले. त्यांना तातडीने धारुर येथील दवाखान्यात उपचारासाठी दाखल करण्यात आले. याप्रकरणी जखमी शेतकरी यांआ मुलगा अशोक मोराळे यांनी केज पोलीसात तक्रार दिली आहे.
दुष्काळात तेरावा
शेतकरी सध्या संकटात असून, खरीप पीक नुकसानीची कोणतीही मदत मिळाली नाही. तोपर्यंत मागील दोन दिवस झालेल्या अवकाळी पाऊस व गारपीटीने हातातोंडाशी आलेला घास हिरावला आहे. याचे प्रशासनाने पंचनामे केले पण मदत मिळणार की, नाही. हे अद्याप स्पष्ट नाही. त्यात 1 लाखा पेक्षा जास्त किंमतीची बैलजोडी वीजेच्या तारा पडल्याने दगावल्याने मोठं आर्थिक नुकसान झाले. त्यामुळे दुष्काळात तेरावा महिना अशी अवस्था झाली आहे. यामुळे शेतकऱ्यास नुकसान भरपाई मिळावी अशी मागणी करण्यात येत आहे.
