लोकगर्जना न्यूज
आडस : धारुर कडे दुचाकीवरून जात असलेल्या पोलीस कर्मचारी यांच्या दुचाकी समोर अचानक कुत्रा आडवा आला. धडक लागून घडलेल्या अपघात पोलीस कर्मचारी जखमी झाले. त्यांना उपचारासाठी अंबाजोगाई येथील स्वाराती रुग्णालयात दाखल करण्यात आले. सदरील घटना धारुर रस्त्यावर आडस येथील जिनिंग जवळ घडली आहे.
डिगांबर गिरी असे जखमी पोलीस कर्मचाऱ्यांचे नाव आहे. आज मंगळवारी ( दि. २० ) सकाळी गिरी अंबाजोगाई येथून धारुर कडे जात होते. दरम्यान आडस येथून ३ कि.मी. धारुर रस्त्यावर असलेल्या जिनिंग जवळ दुचाकी समोर अचानक कुत्रा आडवा आला. समोरील चाक चुकवला परंतु मागील चाकाला कुत्र्याची जोरदार धडक लागली व गिरी दुचाकीसह खाली पडले. त्यांना बराच मार लागला आहे. या अवस्थेत स्वतःच फोन करुन धारुर ठाण्यात अपघाताची माहिती दिली. माहिती मिळताच पोलीस उपनिरीक्षक संतोष भालेराव यांनी आडस येथील काही तरुणांना सांगून तातडीने दवाखान्यात घेऊन जाण्यास सांगितले. तरुणांनी खाजगी वाहनाने त्यांना उपचारासाठी अंबाजोगाई येथील स्वाराती रुग्णालयात दाखल केले आहे. त्यांचा एक हात फॅक्चर झाला असून त्यावर शस्त्रक्रिया करावी लागेल असे डॉक्टरांनी सांगितले असल्याचे पोलीस उपनिरीक्षक संतोष भालेराव यांनी माहिती दिली. सध्या जखमी असलेले डिगांबर गिरी यांच्यावर उपचार सुरू आहेत.
