लोकगर्जनान्यूज
माजलगाव : तालुक्यातील पुरुषोत्तमपुरी येथे दर्शनासाठी आलेला एक भाविक अंघोळ करताना गोदावरी नदी पात्रात बुडाल्याची घटना आज शुक्रवारी सकाळी 9 वाजण्याच्या सुमारास घडली. घटनेची माहिती मिळताच माजलगाव पोलीस व तहसीलदार यांनी घटनास्थळी धाव घेतली असून भाविकाचा शोध सुरू आहे.
अधिक मास सुरू असल्याने अनेक भाविक माजलगाव तालुक्यातील पुरुषोत्तमपुरी येथे दर्शनासाठी येतात. दर्शनापुर्वी भाविक मंदिराजवळून वाहत असलेल्या गोदावरी नदीच्या पात्रात अंघोळ करतात. जालना जिल्ह्यातील भाविक मारुती खवले रा. पाटोदा ( ता. परतुर ) हे पुरुषोत्तमपुरी येथे सकाळी दर्शनासाठी आले. ते अंघोळीसाठी गोदावरी नदी कडे गेले असता पाय घसरुन पडल्याने ते नदी पात्रात बुडाले. घटनास्थळी उपस्थित भाविक व स्थानिक लोकांनी शोध सुरू केला. घटनेची माहिती मिळताच माजलगाव ग्रामीण पोलीस तसेच तहसीलदार वर्षा मनाळे या घटनास्थळी दाखल झाल्या आहेत.
