केज : येथून मांजरसुंबा कडे जाणाऱ्या रस्त्यावरील मस्साजोग जवळ आज सायंकाळी ५ च्या सुमारास ट्रक, कार आणि दुचाकीचा या तीन वाहनांचा तिहेरी अपघात झाला. यामध्ये दोघे जखमी असून त्यांना उपचारासाठी येथील उपजिल्हा रुग्णालयात दाखल करण्यात आले. यातील एकाची प्रकृती गंभीर असल्याने अंबाजोगाई येथे हलविण्यात आले असल्याचे समजते.
मांजरसुंबाच्या दिशेने चाललेला माल वाहतूक ट्रक क्र. टी. एस. १३ यु. बी. ३८४८, तिकडून केजकडे येत असलेली कार क्र. एम. एच. १४ जीयु ८३५७ या दोन्ही वाहनांची मस्साजोग शिवारात समोरासमोर धडक झाली. ट्रकच्या मागे असलेल्या दुचाकी क्र. एम. एच. २१ एफ ३०७० ही अपघातग्रस्त कारला धडकली. या तिहेरी अपघातात कारमधील ऋषिकेश कदम ( वय २५ वर्ष ) रा. धर्माळा ता. केज, दुचाकीस्वार शफीओद्दीन शेख ( वय ५० वर्ष ) रा. गेवराई हे दोघे जखमी झाले. घटनास्थळा पासून बीडचे बॉम्बशोधक पथकातील सहाय्यक फौजदार शिवाजी राठोड, जमादार मच्छिन्द्र बडे, राजेंद्र सांगळे, पोलीस नाईक शिवराज घोंगडे जात होते. त्यांनी गाडी थांबवून जखमींना मदत करत उपचारासाठी केज उपजिल्हा रुग्णालयात पाठविले. दुचाकीस्वार शफीओद्दीन शेख यांचा पाय मोडला असून त्यांच्यावर केज येथे प्रथमोपचार करून प्रकृती गंभीर असल्याने पुढील उपचारासाठी अंबाजोगाई येथे हलविण्यात आले.दुसऱ्या जखमीवर केज येथेच उपचार सुरू आहे.
