लोकगर्जनान्यूज
केज : तालुक्यातील आडस येथे शनिवारी ( दि. २९ ) लंपी बाधित दोन जनावरे आढळून आली. त्यांचे विलगीकरण करण्यात आले असून येथील पशुवैद्यकीय अधिकारी यांनी उपचार सुरू केले आहेत. परंतु शेतकऱ्यांनी आपल्या पशूंची काळजी घ्यावी व जनावरे आजारी असल्यास पशुवैद्यकीय दवाखान्यात आणावी असे आवाहन करण्यात आले आहे.
सध्या जनावरांमध्ये लंपी स्कीन हा संसर्गजन्य आजार फोफावला असून, यामुळे शेतकऱ्यांचे पशू धन संकटात सापडले आहे. या आजाराने शेतकऱ्यांसह शासन,प्रशासनाची झोप उडाली आहे. यासाठी उपाययोजना करण्यात येत असून आडस येथील पशुवैद्यकीय दवाखाना अंतर्गत आडस, केकाणवाडी, लाडेवडगाव, आसरडोह,मोरफळी या पाच गावांमध्ये एकूण ७६ लंपी स्कीन बाधित जनावरे आढळून आली. उपचारानंतर त्यातील ७४ जनावरे लंपी मुक्त झाली आहेत. शनिवारी ( दि. २९ ) लक्ष्मण शिवाजी साखरे यांची गाय तर महादेव कारभारी खडके यांचा बैल हे दोन जनावरे लंपी बाधित आहेत. या दोन्ही जनावरांचे विलगीकरण करण्यात आले आहे. उपचार सुरू केले आहेत. परंतु ते लवकर दाखवले नसल्याने तिव्र लक्षणं असल्याची माहिती पशुवैद्यकीय अधिकारी डॉ. मसने डी.टी. यांनी दिली. लंपी स्कीन या आजाराची जनावरांना लागण झाली तरी शेतकऱ्यांनी घाबरून जाण्याचे कारण नाही. लवकर उपचार मिळाले तर तीन ते पाच दिवसात हा आजार आटोक्यात येतो. पण उशीर झाला तर जनावरे दगावण्याची भीती आहे. यामुळे शेतकऱ्यांनी आपल्या पशूंची काळजी घ्यावी ताप, जनावरे खात नसल्यास, अंगावर गाठी दिसत असल्यास शेतकऱ्यांनी तातडीने जनावरे पशुवैद्यकीय दवाखाना येथे आणावे असे आवाहन डॉ. मसने डी.टी. यांनी केले.
———————————
१०० % लसीकरण
पशुवैद्यकीय दवाखाना,आडस अंतर्गत येणाऱ्या १०० % पशू धनाचे लंपी संसर्गाच्या पार्श्वभूमीवर लसीकरण झाले आहे. भीती न बाळगता जागरुक राहून पशु धनाची काळजी घ्यावी. जनावरे आजारी असतील तर सरकारी पशुवैद्यकीय दवाखान्यात आणावी.
डॉ. मसने डी.टी.
पशुवैद्यकीय अधिकारी, आडस
