अंबाजोगाई-लातूर रस्त्यावरील बर्दापूर जवळ अपघात वास्तुशांतीसाठी चाललेल्या पिकअपला टेम्पोची धडक; १ ठार १९ जखमी
अंबाजोगाई : वास्तुशांतीसाठी पिकअपमध्ये अहमदनगरकडे जाताना बर्दापूर जवळ पिकअप उभे करुन थांबले असता यावेळी भरधाव टेम्पोने पाठीमागून जोराची धडक दिल्याने घडलेल्या अपघातात एक ठार तर १९ जण जखमी झाल्याची घटना ( दि. १९ ) पहाटे अंबाजोगाई-लातूर रस्त्यावर बर्दापूर जवळ घडली आहे. या रस्त्यावरील वाढत्या अपघाताच्या घटना पहाता हा रस्ता चौपदरी करण्यात यावा अशी मागणी जोर धरू लागली आहे.
आजनी बु . ता. शिरुर अनंतपाळ जि. लातूर येथील ठाकूर कुटुंबीय नातेवाईकांसह एम.एच. २४ ए बी ६६२४ या क्रमांकाच्या पिकअप मधून वास्तुशांतीच्या कार्यक्रमासाठी अहमदनगरला जाताना अंबाजोगाई तालुक्यातील बर्दापूर जवळील नंदगोपाल डेअरीजवळ पिकअप रस्त्याच्या बाजूला उभे करुन सर्वजण उतरले होते . परत सर्वांना वाहनात बसवून पिकअपचा चालक ज्ञानेश्वर पांडुरंग ठाकूर ( वय ४२ ) हे फालका लावत असताना पाठीमागून भरधाव वेगाने आलेल्या टेम्पोने पिकअपला जोरात धडक दिली. यावेळी फलका लावत असलेले चालक ज्ञानेश्वर ठाकुर हे दोन्ही वाहनाच्या मध्ये सापडल्याने चिरडून जागीच मृत्यू झाला. पिकअप मधील उर्मिला उद्धव ठाकूर ( ४० ) , खंडू बळीराम खाणशेट्टी ( ४५ ) , मुकेश उद्धव ठाकूर ( १२ ) ,दैवाशाला ठाकूर ( ४० ) , रुख्मिनबाई नामदेव ठाकूर ( ६० ) , रुपाली गोविंद ठाकूर ( ११ ) , रेणुका गोविंद ठाकूर ( ३ ९ ) , कलावती बाजी येरांडे ( ४८ ) , रावसाहेब शिंदे ( ४४ ) , गजानन बालाजी शिंदे ( २७ ) , गंगाधर रामा कोरे ( ७० ) , अजय माधव शिंदे ( १२ ) , बालाजी मुक्ताराम ठाकूर ( ३७ ) , कमलबाई ठाकूर ( ६० ) , ओंकार ज्ञानेश्वर ठाकूर ( १५ ) , मेघा ज्ञानेश्वर ठाकूर ( ३८ ) , मनुबाई गणशेट्टी ( ७० ) , विष्णू ज्ञानेश्वर ठाकूर ( १२ ) सर्व रा . आजनी बु . आणि अर्चना माधव शिंदे ( ३५ , रा . घनसावरगाव ) हे जखमी झाले . अपघात घडून ही टेम्पो चालक टेम्पो सह पळून गेला आहे. अपघाताची माहिती मिळताच बर्दापूर पोलीसांनी घटनास्थळी धाव घेऊन जखमींना मदत केली. यातील जखमींवर अंबाजोगाई येथील स्वाराती रुग्णालयात उपचार सुरू आहेत. एकास लातूर येथे हलविण्यात आले आहे.
