अंबाजोगाई तहसीलदारांच्या वाहनाचा केज जवळ अपघात; दुचाकीला बसली धडक दुचाकीस्वार गंभीर
केज : केज-बीड महामार्गावर अंबाजोगाई तहसीलदारांची शासकीय जीप आणि दुचाकीची धडक होऊन दुचाकीस्वार गंभीर जखमी झाला आहे. नायब तहसीलदार व चालक किरकोळ जखमी आहेत. जखमींना अंबाजोगाई येथील सरकारी दवाखान्यात हलविले आहे.
शनिवारी ( दि.२३ ) अंबाजोगाईचे नायब तहसीलदार मिलिंद गायकवाड हे औरंगाबाद येथील आयुक्त कार्यालयातील बैठक आटोपून अंबाजोगाईकडे जात असताना सायंकाळी ६:३० वा. केज-बीड महामार्ग क्र. (५४८-डी) केज येथील पद्मश्री विठ्ठलराव पाटील सहकारी साखर कारखान्या जवळ सरकारी वाहन क्र. एम. एच.-२३ एफ १५१५ आणि केज कडून मूक बधिर विद्यालयाच्या दिशेने जात असलेले कर्मचारी परशुराम सिरसाट रा. आष्टी ह. मु. फुले नगर केज यांचा दुचाकी क्रमांक एम. एच. ४४ ए ए-३३५४ समोरासमोर जोराची धडक झाली. या अपघातात परशुराम सिरसाट हे गंभीर जखमी झाले आहेत. त्यांच्यावर केज येथील उपजिल्हा रुग्णालयात प्रथमोपचार करून त्यांना अंबाजोगाई येथील स्वाराती रुग्णालयात हलविले आहे. दरम्यान या अपघातात नायब तहसीलदार मिलिंद गायकवाड आणि सरकारी गाडीचे वाहन चालक अंबुरे हे किरकोळ जखमी झाले. त्यांच्यावर केज येथील उपजिल्हा रुग्णालयात प्रथमोपचार करण्यात आले. अपघाताची माहिती मिळताच केज येथील नायब तहसीलदार सचिन देशपांडे हे तात्काळ घटनास्थळी दाखल झाले आणि त्यांनी जखमींना मदत केली.
आपले कर्तव्य संपवून या रस्त्याने गावाकडे जात असलेले पोलीस नाईक कागदे यांनी अपघात पहाताच तात्काळ पोलीस सहाय्यक निरीक्षक शंकर वाघमोडे यांच्याशी संपर्क साधला त्या नंतर पोलीस नाईक धनपाल लोखंडे, महादेव बहिरवाळ आणि हनुमंत गायकवाड हे घटनास्थळी दाखल झाले.
