लोकगर्जनान्यूज
बीड / केज : शहरापासून जवळच असलेल्या पांगरबावडी जवळ अज्ञात वाहनाने दुचाकीला धडक देऊन पसार झाला. यामध्ये दुचाकीवरील एकजण जागीच ठार तर दुसरा गंभीर जखमी झाला. ही घटना आज सायंकाळी साडेपाच सुमारास घडली तर केज तालुक्यातील माळेगाव येथे जीपने धडक दिल्याने वृध्द महिला व म्हैस ठार झाली. सदरील घटना ६ वाजण्याच्या सुमारास केज-कळंब रस्त्यावर घडली. या दोन्ही घटना बुधवारी ( दि. १५ ) घडल्या आहेत.
मयत राजकुमार अंकुश कुटे ( वय ४३ वर्ष ) रा. कुटेवाडी हल्ली मुक्काम बीड हे व सुरेश कारभारी गीराम दोघे शेतातून दुचाकी क्र.एम.एच. २३ ए एच ८२३४ वरुन येत होते. दरम्यान ते शहरापासून जवळच असलेल्या पांगर बावडी जवळ आले असता बीड येथून तेलगावच्या दिशेने जात असलेल्या अज्ञात वाहनाने दुचाकीला जोराची धडक देऊन पसार झाला. यामुळे राजकुमार कुटे यांचा मृत्यू झाला. घटनेची माहिती मिळताच पेठ बीड पोलीसांनी घटनास्थळी धाव घेऊन जखमी सुरेश गीराम यांना जिल्हा रुग्णालयात दाखल केले. दुसरा अपघात माळेगाव ( ता. केज ) येथे सायंकाळी सहा वाजण्याच्या सुमारास घडला. मयत महिला रुक्मिणी शंकर गुंठाळ ( वय ६५ वर्ष ) या सायंकाळी ६ वाजण्याच्या सुमारास दिवसभर शेतात काम करुन म्हैस घेऊन घरी जात होत्या. यावेळी समोरुन आलेल्या भरधाव जीपने क्र. एम.एच. २३ इ ४६२८ म्हैस व वृद्धेला धडक दिली. ही धडक इतकी जोरात होती की, म्हैस व महिला दोघं जागीच ठार झाले. या दोन्ही घटनेमुळे हळहळ व्यक्त केली जात आहे.
चालकाचा पळून जाण्याचा प्रयत्न फसला
जीप चालकाने जोरात धडक दिली. यामध्ये महिला रक्ताच्या थारोळ्यात पडलेली असताना मदत न करता कळंबच्या दिशेने वाहनासह पळून जाण्याचा प्रयत्न केला. परंतु घटनास्थळी उपस्थित नागरिकांनी पाठलाग करुन चालक व जीप दोन्ही युसुफ वडगाव पोलीसांच्या ताब्यात दिले.
