तुम्ही बँक खाते तपासले का? खरीप पीक विमा खात्यावर पडण्यास सुरुवात

लोकगर्जनान्यूज

केज : खरीप हंगाम २०२४ मधील पीक विमा संदर्भात मोठी ओरड झाल्यानंतर विमा कंपन्या ताळ्यावर आल्या असून, सोमवार (दि.१४) पासून केज तालुक्यातील शेतकऱ्यांच्या खात्यावर पीक विमा रक्कम जमा होण्यास सुरुवात झाली. पण तालुका एकच असला तरी महसूल मंडळ बदलले की, रकमेत तफावत असल्याची शेतकऱ्यांची तक्रार आहे.

मागील वर्षी खरीप हंगामात सुरवातीला पावसाचा खंड त्यानंतर अतिवृष्टी, तसेच पीक काढणीस आल्यानंतर अतिवृष्टी झाली. यामुळे शेतकऱ्यांचे मोठे नुकसान झाले. काही महसूल मंडळात अग्रीम मंजूर झाले तर काही मंडळात नाही. याचीही मोठी ओरड झाली. यानंतर पीक विमा मंजूर करण्यासाठी आंदोलन झाली. यामुळे पीक विमा कंपनी, प्रशासन आणि शेतकरी असा संघर्ष निर्माण झाला होता. या सर्व प्रकारानंतर कसाबसा पीक विमा मंजूर झाल्याचे काही दिवसांपूर्वी वृत्त आले. आता प्रत्यक्षात शेतकऱ्यांच्या खात्यावर पीक विमा रक्कम जमा होत असल्याचे केज तालुक्यातील अनेक शेतकऱ्यांनी सांगितले आहे. पण यातही तफावत असल्याची तक्रार आहे. तालुका एक असला तरी महसूल मंडळ बदलले की, नुकसान भरपाईची हेक्टरी रक्कम कमी जास्त प्रमाणात येत आहे. तर ज्या शेतकऱ्यांनी नुकसानीची ऑनलाईन तक्रार केली आहे त्याच शेतकऱ्यांना नुकसानभरपाई मिळत असल्याचे चित्र आहे. यामुळे ऑनलाईन तक्रार न केलेल्या शेतकऱ्यांच्या नशिबी निराशाच दिसून येत आहे.