ग्रामपंचायत सदस्यांना मासिक भत्ता देण्याचे सीईओंचे आदेश; आमदार नमिता मुंदडा यांच्या प्रयत्नाला यश

लोकगर्जना न्यूज

सन २०१८ पासून रखडलेल्या ग्रामपंचायत सदस्य मासिक भत्त्याचा मार्ग आमदार नमिता मुंदडा यांच्या प्रयत्नामुळे मोकळा झाला. याप्रकरणी बीड जिल्हा परिषदेचे सीईओ अजित पवार यांनी गटविकास अधिकाऱ्यांना पत्र काढून भत्ता देण्याचे आदेश दिले आहेत. याबाबतीत प्रथम आडस ग्रामपंचायत सदस्य शिवरुद्र आकुसकर यांनी आमदारांना निवेदन दिले होते. त्यामुळे ग्रामपंचायत सदस्यामधून आभार मानले जात आहे.

बीड जिल्ह्यातील अनेक ग्रामपंचायती सदस्यांना मासिक बैकीचा भत्ता देत नसल्याने आडस येथील ग्रामपंचायत सदस्य शिवरुद्र आकुसकर यांनी माहिती अधिकारातून याबाबत माहिती मागवली होती. यातून सन २०१८ पासून जिल्ह्यातील सदस्यांना मासिक भत्ता दिला गेला नसल्याची धक्कादायक माहिती समोर आली. यानंतर आकुसकर यांनी केज विधानसभा मतदारसंघाच्या आमदार नमिता मुंदडा यांना निवेदन देऊन मासिक भत्ता मिळवून देण्याची मागणी केली. या निवेदनाची दखल घेऊन आमदार मुंदडा यांनी ग्रामविकासमंत्री यांना पत्र लिहून बीड जिल्ह्यातील ग्रामपंचायत सदस्यांना मासिक बैकीचा भत्ता मिळत नसल्याचा प्रश्न उपस्थित करून, तो अदा करण्याची मागणी केली. याची दखल घेऊन बीड जि.प. चे सीईओ अजित पवार यांनी जिल्ह्यातील सर्व पंचायत समिती गटविकास अधिकाऱ्यांना पत्र काढून ग्रा.पं. सदस्य तसेच सरपंच, उपसरपंच यांचा २०१८ पासून थकित मासिक भत्ता देण्याचे, तसेच याबाबतीत केलेल्या कारवाईचा अहवाल सादर करण्याचे आदेश दिले आहेत. यामुळे कार्यकाळ संपण्याच्या शेवटच्या टप्प्यात ग्रामपंचायत सदस्यांच्या मासिक भत्त्याचा मार्ग मोकळा झाला आहे. या प्रकरणी लक्ष घालून प्रश्न सोडविल्याने आमदार नमिता मुंदडा यांचे ग्रामपंचायत सदस्यांनी आभार मानले आहेत.

सामान्य कार्यकर्त्याला बळ देणारं मुंदडा कुटुंब – शिवरुद्र आकुसकर

सन २०१८ ग्रामपंचायत निवडणुकीत निवडून आलेल्या सदस्यांना चार वर्षांपेक्षा जास्त काळ होऊन गेला परंतु मासिक हप्ता मिळत नाही. याबाबतीत आमदार नमिता मुंदडा यांना निवेदन दिले. या निवेदनाची तातडीने दखल घेऊन आमदार ताईंनी ग्रामविकास खात्याकडे पाठपुरावा केला. ग्रामपंचायत सदस्यांचा थकीत मासिक भत्ता देण्याचे आदेश सीईओ यांनी काढले आहेत. त्यामुळे भत्ता मिळण्याचा मार्ग मोकळा झाला. हे आमदार नमिता मुंदडा, अक्षय मुंदडा, नंदकिशोर मुंदडा यांच्या पाठपुराव्यामुळे झाले. हे कुटुंब प्रत्येक सामान्य कार्यकर्त्याला बळ देणारे असल्याचे सांगून आमदार मुंदडा यांचे शिवरुद्र आकुसकर यांनी आभार मानले आहेत.