केज नगराध्यक्ष एससीसाठी आरक्षित; कोणाची वर्णी लागणार याकडे शहरवासीयांचे लक्ष लागले
केज : नगराध्यक्षांचे आरक्षण आज घोषित करण्यात येणार होते. त्यामुळे जिल्ह्यातील पाच नगर पंचायतीच्या हद्दीतील नागरिकांसह पुढाऱ्यांचे लक्ष लागले होते. आरक्षण घोषित झाले असून केज नगर पंचायतीचे नगराध्यक्ष एससी पुरुषासाठी आरक्षित झाले आहे. त्यामुळे नगराध्यक्षाची माळ कोणाच्या गळ्यात पडणार याकडे शहर वासियांचे लक्ष लागले आहे.
नुकतीच केज नगर पंचायतीची सार्वत्रिक निवडणूक झाली. यामध्ये केजच्या मतदारांनी कोणालाही स्पष्ट बहुमत न दिल्याने त्रिशंकू स्थिती आहे. काल बुधवारी कॉंग्रेस व जनविकास आघाडी एकत्र आली आहे. त्यामुळे यांची सत्ता येणार हे स्पष्ट झाले. आज नगराध्यक्ष पदाचे आरक्षण घोषित झाले. केज नगराध्यक्ष एससी पुरुषासाठी आरक्षित झाले आहे. एससी चे सीता बन्सोड, पद्मीनी शिंदे, पल्लवी रांजनकर हे तिन्ही सदस्य आघाडीचे विजयी झाले आहेत. या तिन्ही महिला असल्याने नगराध्यक्ष महिलाच होणार परंतु वर्णी कोणाची लागणार याकडे लक्ष लागले आहे. आतापर्यंत सत्ता कोणाची येणार ही चर्चा थांबताच आता नगराध्यक्ष कोण होणार? ही चर्चा व अंदाज जोर धरणार आहे. तसेच तीन उमेदवार असल्याने नगराध्यक्षपदासाठी मोठी चुरस निर्माण होईल असा अंदाज वर्तविण्यात येत आहे. जिल्ह्यातील आरक्षण
आष्टी,पाटोदा,शिरूर कासार तिन्ही नगरपंचायतचे नगराध्यक्षपद
सर्वसाधारण महिलासाठी आरक्षित झाले. तर केज एससी सर्वसाधारण व वडवणी सर्वसाधारण असे आरक्षण जाहीर झाले. नगराध्यक्ष निवड फेब्रुवारी महिन्यात होणार आहे!
