केज जवळील कदमवाडी फाट्यावरील घटना
कार पुलाला धडकून घडलेल्या भीषण अपघातात दोघे ठार झाल्याची घटना आज मंगळवारी (दि.१६) पहाटे केज-मांजरसुंबा राष्ट्रीय महामार्गावर कदमवाडी फाट्यावर घडली आहे. मयतामध्ये परळी येथील बूट,चप्पलचे ठोक विक्रेते इम्रान कच्छी अन् चालकाचा समावेश आहे. मृतदेहांचे शवविच्छेदन केज उपजिल्हा रुग्णालयात करण्यात आले.
इम्रान इब्राहिम कच्छी (वय ५० वर्ष), चालक अझरुद्दीन बाबामिया शेख (वय ४० वर्ष) दोघे रा. परळी अशी मयतांची नावे आहेत. इम्रान कच्छी यांचा परळी येथे फुटवेअर चा ठोक विक्रीचा व्यवसाय आहे. ते काही कामा निमित्त मुंबई येथे गेले होते. तेथून ते परळीकडे कार क्र. एम.एच. ०२ सी एच ६७८९ मध्ये जात होते. दरम्यान पहाटे ६ वाजण्याच्या सुमारास ते केज-मांजरसुंबा राष्ट्रीय महामार्गावर कदमवाडी फाट्याजवळ आले असता अचानक कार रस्त्याच्या खाली उतरुन पुलाला धडकली, धडक इतकी भीषण होती की, आतील दोघांचा मृत्यू झाला. घटनेची माहिती मिळताच पोलीस आणि रुग्णवाहिकेने धाव घेतली दोघांनाही केज उप जिल्हा रुग्णालयात दाखल केले. तोपर्यंत दोघांचाही मृत्यू झाला होता. केज येथे उपजिल्हा रुग्णालयात मृतदेहांचे शवविच्छेदन करुन दोन्ही मृतदेह नातेवाईकांच्या ताब्यात देण्यात आले. या घटनेने हळहळ व्यक्त केली जात आहे.
